Juan Antonio Corbalán notouno na afluencia de peregrinos que se foi atopando no traxecto. Moitos deles, curiosos pola súa presenza na ruta e tras interesarse polo fin do proxecto, non desaproveitaron a oportunidade de fotografarse con el.
O Río Iso escoltou aos nosos peregrinos nun día fresco e menos duro que os anteriores. Entre eles, José Luis Mateo, director xeral do club, que valoraba así a experiencia de deixar os despachos por uns días e acompañar á lenda nesta causa solidaria: “Hoxe en concreto estivemos a revivir os Xogos Olímpicos de Los Ángeles 84, un punto de inflexión na historia do baloncesto español”, confesaba. “Puidemos saber de primeira man as vivencias previas á competición e as claves daquel éxito tan importante”, engadía.
Arzúa, capital do queixo, recibía á expedición á primeira hora da tarde, aínda que Monbus volverá desprazar aos nosos peregrinos ás casas do Cura e Farruco, de Naturlar, onde descansarán ata volver mañá ao momento de saída cara a O Pedrouzo.